તેમના ગયા પછી ગામના વડીલોએ આ જગ્યા ઉપર શ્રી હનુમાનદાદાનું મંદિર બનાવવાનું નક્કી કર્યું અને ગામના સહયોગથી તા.27-04-2002ના રોજ મંદિરની પ્રાણ પ્રતિષ્ઠા કરવામાં આવી. કહેવાય છે કે પ્રતિષ્ઠાના દિવસે પવન પુત્ર પોતાની સાક્ષાત હાજરી પુરવા આવ્યા હોય તેમ જોરદાર વાવાઝોડું આવેલ હતું અને આ જગ્યા ઉપર બાંધેલ પ્રતિષ્ઠાનો આખો મંડપ ઉડી ગયો હતો. જેથી ગામના લોકોને પ્રતિષ્ઠાનો નવો મંડપ ગામમાં શ્રી રામજી મંદિર પાસે ફરીથી બંધાવવો પડેલ હતો. શ્રી હનુમાનદાદા સાક્ષાત ગામમાં શ્રીરામને મળવા આવ્યા હોય તેવી અનુભૂતિ ગ્રામ લોકોને થયેલ હતી. ગામના વડીલો દ્વારા વર્ષ 2012 માં ગામના જુના શ્રી રામજી મંદિરને નવીન બનાવવાનું નક્કી કર્યું અને આ મંદિરની પૌરાણિક રામ લક્ષ્મણ જાનકીની મૂર્તિઓ સદર શ્રી હનુમાનજી મંદિરમાં લાવવામાં આવી. આમ શ્રી રામદાસ બાપુને જુના શ્રી રામજી મંદિરની જે જગ્યાએથી સદર શ્રી હનુમાનજી મંદિરની સ્થાપનાનો વિચાર આવેલ હતો તે સમગ્ર શ્રી રામ દરબાર સ્વયં શ્રી હનુમાનદાદાએ પોતાના સમક્ષ પ્રસ્થાપિત કરી દીધો. સદર મંદિરમાં દર્શનાર્થી જે પણ મનોકામના લઈને આવે છે તે સંપૂર્ણ દાદા પોતાના આશીર્વાદથી પૂર્ણ કરી દે છે. જેથી જ આ મંદિરનું નામ "શ્રી મનોકામના સિધ્ધ હનુમાનજી મંદિર" છે. ગામના યુવાનોએ યથાગ મહેનત કરી આ મંદિરના બગીચાને વિકસિત કરેલ છે અને નિયમિત રીતે મંદિર તેમજ બગીચાની જાળવણી પણ કરી રહ્યા છે. તેમ છતાં તેઓ એક જ વિઝન સાથે કાર્ય કરે છે કે "સદર મંદિર સમગ્ર ગામ તેમજ સર્વ દર્શનાર્થીઓની સંસ્થા છે, અમો તો માત્ર સેવા જ આપી રહ્યા છીએ."